સાવધાન! આગામી 6 દિવસ મેઘરાજા મચાવશે કહેર, હવામાન વિભાગે જાહેર કરી નવી આગાહી

રાજ્યભરમાં વરસાદી માહોલ બરાબરનો જામ્યો છે અને ચોમાસું તેની ચરમસીમાએ પહોંચ્યું છે. ચારેબાજુ પાણી-પાણી કરી દેનાર વરસાદ વચ્ચે હવે હવામાન વિભાગે આગામી 6 દિવસ માટે નવી આગાહી કરી છે. રાજ્ય પર એકસાથે ચાર-ચાર વરસાદી સિસ્ટમ સક્રિય થતાં અને પાંચમી સિસ્ટમ ટૂંક સમયમાં સક્રિય થવાની સંભાવનાને પગલે ગુજરાતના અનેક જિલ્લાઓમાં ‘અતિભારે’ વરસાદની ચેતવણી જારી કરવામાં આવી છે. નાગરિકોને સાવચેત રહેવા અને જરૂરી તકેદારી રાખવા અપીલ કરવામાં આવી છે.

જાણો, આજે ક્યા ક્યા જિલ્લાઓ એલર્ટ પર?

હવામાન વિભાગ દ્વારા જારી કરાયેલી સૂચના મુજબ, આજે દક્ષિણ ગુજરાત અને સૌરાષ્ટ્રના કેટલાક જિલ્લાઓમાં મેઘરાજા રૌદ્ર સ્વરૂપ ધારણ કરી શકે છે. ખાસ કરીને નવસારી, વલસાડ, નર્મદા, છોટાઉદેપુર, ભાવનગર, અમરેલી અને ગીર સોમનાથમાં ‘ઓરેન્જ એલર્ટ’ જાહેર કરવામાં આવ્યું છે, જે સૂચવે છે કે આ વિસ્તારોમાં અતિભારે વરસાદ પડી શકે છે. આ ઉપરાંત, ડાંગ, તાપી, સુરત, ભરૂચ, વડોદરા, પંચમહાલ, દાહોદ, મહીસાગર, અરવલ્લી, સાબરકાંઠા, બોટાદ, રાજકોટ, જૂનાગઢ અને પોરબંદરમાં ‘યલો એલર્ટ’ હેઠળ છૂટાછવાયા સ્થળોએ ભારે વરસાદની સંભાવના વ્યક્ત કરવામાં આવી છે.

આવતીકાલે ગાજવીજ સાથે ધોધમાર વરસાદની આગાહી

હવામાન વિભાગના જણાવ્યા અનુસાર, આવતીકાલે એટલે કે 18મી ઓગસ્ટના રોજ રાજ્યના મોટાભાગના વિસ્તારોમાં વરસાદનું જોર યથાવત રહેશે. આ દરમિયાન ભારે ગાજવીજ અને પવન સાથે ધોધમાર વરસાદ ખાબકવાની પૂરી સંભાવના છે. હાલ સક્રિય ચાર વરસાદી સિસ્ટમોને કારણે વાતાવરણમાં ભરપૂર ભેજ છે, જે ભારે વરસાદ માટે અનુકૂળ પરિસ્થિતિઓનું નિર્માણ કરી રહ્યું છે.

19મી ઓગસ્ટે સૌરાષ્ટ્ર અને દક્ષિણ ગુજરાતમાં વરસાદનું જોર વધશે

19મી ઓગસ્ટના રોજ વરસાદનું જોર વધુ પ્રચંડ બનશે. આ દિવસે દક્ષિણ ગુજરાતની સાથે સૌરાષ્ટ્રના જિલ્લાઓમાં પણ મેઘતાંડવ જોવા મળી શકે છે. હવામાન વિભાગે જુનાગઢ, રાજકોટ, સુરેન્દ્રનગર, ગીરસોમનાથ, અમરેલી, બોટાદ, ભાવનગર, અમદાવાદ, આણંદ, ખેડા, અરવલ્લી, મહીસાગર, પંચમહાલ, ભરૂચ, દાહોદ, છોટાઉદેપુર, નર્મદા, સુરત, ડાંગ, તાપી, નવસારી અને વલસાડ જિલ્લામાં ભારેથી અતિભારે વરસાદની આગાહી કરી છે. કેટલાક વિસ્તારોમાં ભારે પવન સાથે વરસાદ ત્રાટકવાની પણ ચેતવણી અપાઈ છે.

20મી ઓગસ્ટે સૌરાષ્ટ્રના મોટાભાગના વિસ્તારોમાં ઓરેન્જ એલર્ટ

20મી ઓગસ્ટના રોજ સૌરાષ્ટ્રના દરિયાકાંઠાના વિસ્તારો પર સંકટના વાદળો વધુ ઘેરાશે. વલસાડ, નવસારી, ડાંગ, તાપી, સુરત, ભરૂચ, નર્મદાની સાથે ભાવનગર, અમરેલી, ગીર સોમનાથ, જૂનાગઢ, રાજકોટ, પોરબંદર, જામનગર અને દ્વારકામાં ‘ઓરેન્જ એલર્ટ’ જાહેર કરાયું છે. જ્યારે રાજ્યના અન્ય બાકીના જિલ્લાઓમાં ‘યલો એલર્ટ’ યથાવત રહેશે, જ્યાં છૂટાછવાયા ભારે વરસાદી ઝાપટાં પડી શકે છે.

21 અને 22 ઓગસ્ટે સાર્વત્રિક મેઘમહેરની સંભાવના

21 ઓગસ્ટના રોજ રાજ્યના મોટાભાગના વિસ્તારોમાં ગાજવીજ સાથે હળવાથી મધ્યમ વરસાદ ચાલુ રહેવાની ધારણા છે. જોકે, સૌરાષ્ટ્ર અને કચ્છના કેટલાક ભાગોમાં વરસાદનું જોર યથાવત રહી શકે છે, જેના કારણે નીચાણવાળા વિસ્તારોમાં પાણી ભરાવાની સમસ્યા સર્જાઈ શકે છે.

22 ઓગસ્ટ દરમિયાન ગુજરાતમાં સાર્વત્રિક મેઘમહેર જોવા મળશે. હવામાન નિષ્ણાતોના મતે, આ દિવસે સૌરાષ્ટ્ર અને દક્ષિણ ગુજરાતના ભાગોમાં 5 થી 10 ઇંચ સુધીનો અત્યંત ભારે વરસાદ ખાબકી શકે છે. જ્યારે ઉત્તર અને મધ્ય ગુજરાતમાં પણ 3 થી 6 ઇંચ જેટલો નોંધપાત્ર વરસાદ પડવાની સંભાવના છે. આ વરસાદી રાઉન્ડમાં કચ્છ જિલ્લાને પણ સારો એવો લાભ મળવાની પૂરી શક્યતાઓ છે.

વધુ માહિતી માટે હવામાન વિભાગનો આ વિડિઓ જુઓ: